ನೆನಪುಗಳು ನೂರಾರು
--------------------
ಒಂದನೇ ತರಗತಿಯಲ್ಲಂದೂ ಒಕ್ಕೊರಲಿನಲಿ ಕಾಗುಣಿತ.. ಮಗ್ಗಿ ಹೇಳಿದ್ದು
ಗೋಲಿ, ಬುಗುರಿ, ಚಿನ್ನಿದಾಂಡು, ಮರಕೋತಿ, ಕಣ್ಣಾಮುಚ್ಚಾಲೆ,ಲಗೋರಿ ಆಡಿದ್ದು
ಸ್ವಾತಂತ್ರ್ಯ ದಿನಾಚರಣೆಯ ಮೆರವಣಿಯಲಿ ಭಾರತಾಂಬೆಗೆ ಜೈಕಾರ ಹಾಕಿದ್ದು
ಕಾವೇರಿ ಚಳವಳಿಯಲಿ ಭಾಗವಹಿಸಿ..ಅರ್ಥವಾಗದ ವಯಸ್ಸಿನಲ್ಲಿ ಧಿಕ್ಕಾರ ಕೂಗಿದ್ದು
ಗೆಳೆಯರೊಡಗೂಡಿ ಟೆಂಟ್ ಸಿನಿಮಾ ನೋಡಿ.. ಶಿಳ್ಳೆ ಹಾಕಿದ್ದು
ಶೈಕ್ಷಣಿಕ ಪ್ರವಾಸದಲ್ಲಿ ಬಸ್ಸಿನಲ್ಲಿ ಹಾಡಿಗೆ ಎಲ್ಲರೊಂದಿಗೆ ನಕ್ಕು ನಲಿದು,ಕುಣಿದಿದ್ದು

ಕಬ್ಬಿನ ಗದ್ದೆಯಲ್ಲಿ.. ಯಾರ ಅಪ್ಪಣೆಗೂ ಕಾಯದೆ ಕಬ್ಬು ಮುರಿದು.. ಹೆದರಿ ಓಡಿದ್ದು
ಕಾಲುವೆಯಲಿ ಈಜಾಡಿ..ಅಪ್ಪನ ಬೈಗುಳಕ್ಕೆ ಹೆದರಿ ಬೆವರಿದ್ದು
ಶಾಲಾ ವಾರ್ಷಿಕೋತ್ಸಕೆ ನಾಟಕದ ತಾಲೀಮು ನಡೆಸಿ.. ನಟಿಸಿ.. ಚಪ್ಪಾಳೆ ಗಿಟ್ಟಿಸಿದ್ದು.. ಬಾಲ್ಯದ ನೆನಪುಗಳು ನೂರಾರು,ಮನದಂಗಳದಿ ಹಚ್ಚ ಹಸಿರು..ಎಂದೂ ಮರೆಯಲಾಗದ್ದು.